«Կլինեն բանակցություններ». ԱԳ նախարարը՝ Լարսի այլընտրանքի մասին

Վերին Լարսին այլընտրանքային ճանապարհի հարցն առաջին հերթին առնչվում է Ռուսաստանին և Վրաստանին, և այդ առումով բանակցությունները երկու կողմերի միջեւ շարունակվում են: Այս մասին, Վրաստանում հայ համայնքի ներկայացուցիչների հետ հանդիպումից հետո լրագրողների հետ զրույցում նշել է արտգործ նախարար  Զոհրաբ Մնացականյանը:

«Մենք շատ ուշադիր հետևում ենք այդ զարգացումներին, և դրա վերաբերյալ խոսում ենք դրա մասին մեր երկու գործընկերների`  Ռուսաստանի և  Վրաստանի հետ: Սակայն հիշենք, որ բանակցող կողմերը Ռուսաստանն ու Վրաստանն են: Մենք  հույս ունենք,  որ իրապես կլինի իրավիճակ, երբ հարցի հանգուցալուցումն ավելի տեսանելի, շոշափելի կդառնա»:

Հարցին, թե դա ինչ ժամկետների խնդիր է, մոտ ապագայում, թե՝ ոչ,  նախարարն արձագանքեց. «Ես կարող եմ հույս հայտնել, որ դա կարող է լինել, որովհետեւ բանակցությունների նոր փուլ է մոտենում: Ինչպես դա կընթանա և ինչ առաջխաղացում կարող է լինել... իհարկե հարցին հետևելով՝ կարող եմ ուղղակի հույս հայտնել, որ կլինի նման իրավիճակ, բայց դրանից ավելի չեմ կարող ասել»: