12 08 2018

Ի՞նչ անել, եթե տեսնում եք խեղդվողի

Ի՞նչ անել, եթե տեսնում եք խեղդվողի

Հայաստանում ջրահեղձման դեպքերը գրանցվում են հիմնականում ամռանը, երբ մարդիկ շոգից ու տապից «փախչում են» Սևանա լիճ կամ այլ ջրավազաններ: Ջրում խեղդվել կամ վտանգավոր վիճակում կարող է հայտնվել յուրաքանչյուրը` անկախ լողալու վարպետության աստիճանից:

ԱԻՆ-ը ներկայացնում է, թե ինչ է պետք անել, եթե տեսնում եք խեղդվողի: Ամենակարևորը. ջրային պատահարների գերակշիռ դեպքում խեղդվողը չի կարողանում օգնություն կանչել նաև խուճապի մեջ ընկնելու պատճառով: Եթե ջրավազանի ափին եք և ջրում գտնվողի տարօրինակ վարքի ականատես, մեծ է հավանականությունը, որ լողորդը օգնության կարիք ունի: Ուշադիր, զգույշ և առանց հապաղելու օգնության հասեք: Եթե հնարավոր է՝ փորձեք օգնություն ցույց տալ առանց ջուրը մտնելու:

Խեղդվողը կարող է առանց մտածելու կառչել ձեր պարանոցից, և դուք ինքներդ օգնողից կդառնաք տուժող։ Ամեն դեպքում` խոսեք նրա հետ, հուսադրող և քաջալերող արտահայտություններ օգտագործեք, նրան մեկնեք ջրում չսուզվող առարկա` ծառի ճյուղ, փայտյա ձող, բերանը փակած պլաստիկ տարա: Հենց տուժածը բռնի առարկան, դանդաղ քաշեք այն դեպի ափ: Եթե տուժածը ափից հեռու է, առարկան կապեք պարանով և նոր նետեք: Եթե տուժածը մոտ է` ձեռքի հեռավորության վրա, իսկ ջրավազանի ափը կտրուկ է, պառկեք ափին և զգուշորեն ձեռք մեկնեք:

Ողջ ընթացքում խոսեք տուժածի հետ:Եթե տեղյակ եք ու վստահ, որ ջուրը ծանծաղ է, չի անցնում ձեր ուսերից, կարող եք կանգնել ջրի մեջ և նույնը անել: Աշխատեք տուժածին շատ չմոտենալ, առարկան մոտեցրեք, այն թող լինի ձեր և տուժածի միջև:Եթե տուժածը ջրի մեջ երեսնիվայր է, զգուշորեն շրջեք և թևատակերից բռնելով՝ հետ-հետ քայլելով հանեք ջրից: Եթե ենթադրում եք, որ տուժածի ողնաշարը վնասված է, աշխատեք բացառել գլխի և ողնաշարի շարժումները: Տուժածի մարմինը հորիզոնական դիրքով` դեմքով դեպի վեր, պահեք ջրում և առանց հապաղելու զանգահարեք արագ արձագանքման ծառայություններ

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ