Եթե ոստիկանությունը մի բան գտած լիներ, ամեն անկյունից կգոռային չարաշահումների մասին. «Էլլիպս» ընկերության տնօրեն

Հունիսի 21-ին «Սեքյուրիթի Դրիմ» և «Էլլիպս» ընկերություններում իրականացված հատուկ գործողություններից հետո ոստիկանությունը հայտարարեց, որ կեղծ հաշվետվություններ են ներկայացրել Ճանապարհային ոստիկանություն, ինչի արդյունքում ընկերությունների տնօրինությունը շուրջ 1 միլիարդ 15 միլիոն 869 հազար 600 հարյուր դրամ է հափշտակել: Ընկերությունների տնօրեննեը հանդես եկան հայտարարություններով, որ ոչ մի չարաշահում չկա, ոստիկանությունը շտապել է հայտարարություններ անելիս: Մի քանի օր հետո՝ հունիսի 25-ին Ոստիկանությունը նորից հայտարարություն տարածեց, որ գործողություններ է իրականացնում «Էլլիպս» ընկերությունում: Բայց միայն այդքանը, այդպես էլ պարզ չդարձավ՝ ինչ են հայտնաբերել:

Ոստիկանության լռությունը զարմանալի է նաև «Էլլիպս Ջի Էյ» ընկերության տնօրեն Ալեքսան Զաքարյանի համար:

«Մենք էլ ձեզ պես սպասում ենք Ոստիկանության հայտարարությանը, սպասում ենք՝ տեսնենք, թե նման համարձակ հայտարարություն որ արել են, ո՞նց են տակից դուրս գալիս: Երևի շատ գործ ունեն, չեն հասցնում»,- մեզ հետ զրույցում ասաց նա:

Սա հատկապես զարմանալի է թվում Զաքարյանին, քանի որ առաջին անգամ հատուկ գործողություններ իրականացնելուց հետո հայտարարությունը հրապարակվեց ընդամենը 19 րոպե հետո: «Մեզ մոտից գնացին 12-ին, հայտարարությունը հրապարակվեց 12:19-ին: Առաջին անգամ մենք կարծում էինք, որ մեր միջոցով ուզում են Սաշիկին պատժել, այս անգամ ինձ թվում է մեր մոտ Սաշիկին էին փնտրում, ինչը խիստ անհասկանալի է մեզ համար»,- ասաց նա:

Զաքարյանի խոսքով՝ երկու այցերն իրարից այդքան էլ չէին տարբերվում, եկել են, փաստաթղթերը վերցրել, գնացել:

Նա նաև նշեց, որ դրա պատճառով խափանվել է ընկերության բնականոն աշխատանքը, ոստիկանություն չեն դիմում, որ տպավորություն չստեղծվի, թե անհանգստացած են: «Իրենց այդ հայտարարություններից հետո համարյա մեկ շաբաթ ոչ մի հաճախորդ չէր մտնում, մարդիկ էլ չեն խորանում, թե ինչ է եղել իրականում: Փաստորեն՝ էս 30 տարվա մեր հեղինակությանն են վնասում»:

Անելիքների մասին ընկերության տնօրենը չշտապեց խոսել: Ինչպես ինքը նշեց, ամեն դեպքում՝ Ոստիկանության պես հապճեպորեն չեն վարվի, կսպասեն վերջնական հայտարարությունների՝ ինչ կասեն և ինչ տոնով կասեն:

Զաքարյանը նաև ավելացրեց այս լռությունը հուշում է, որ որևէ բան չեն գտել, հակառակ դեպքում ամեն անկյունից կգոռային չարաշահումների մասին: