Երևանի քաղաքապետարանը պարտավորված կվճարի բոլորին. փոխքաղաքապետ

Հայաստանում արտակարգ դրության ռեժիմի հետևանքով հարկադիր պարապուրդում եղած ողջ ժամանակահատվածի համար կվճարվեն Երևանի քաղաքապետարանի ենթակայությամբ գործող բոլոր հաստատությունների աշխատակիցները՝ լրիվ աշխատավարձի չափով: Այս մասին Yerevan․Today-ի հետ զրույցում նշեց Երևանի փոխքաղաքապետ Տիգրան Վիրաբյանը: Ընդ որում, ցանկում միայն 161  մանկապարտեզներն ու դպրոցները չեն:

«Անկախ հանգամանքներից՝ ամբողջ աշխատավարձի չափով կվճարվեն նաև մեր հինգ թանգարանների՝ Էրեբունի պատմահնագիտական արգելոց-թանգարանի, Երևանի պատմության, Երևանի ժամանակակից արվեստի, Ֆրիտյոֆ Նանսենի և Կարեն Դեմիրճյանի թանգարանների աշխատակազմերը, Ղափլանյանի անվան պետական Դրամատիկական թատրոնինը, Մհեր Մկրտչյանի անվան և Պատանի հանդիսատեսի թատրոնի կոլեկլտիվները, ինչպես նաև մեր մանկապատանեկան ստեղծագործական կենտրոնների, սպորտդպրոցների, արվեստի և երաժշտական դպրոցների աշխատակիցները»,- հավելեց Վիրաբյանը:

Հիշեցնենք, մարտ ամսին համաճարակային իրադրության պատճառով միայն մեկ շաբաթ գործեցին կրթական և նախակրթական հաստատությունները, մարտի 9-ից կառավարության որոշմամբ վերսկսված դասապրոցեսը կրկին կասեցվեց՝ այս անգամ արտակարգ դրություն հայտարարելու պատճառով:

Արտակարգ դրությունը իրավական ուժ ստացավ մարտի 16-ին, ժամը 18։30-ից սկսած և ուժի մեջ է լինելու մինչև ապրիլի 14-ը՝ ժամը 17։00-ն ՝ ողջ հանրապետության տարածքում։

Սյուզի Բադոյան