24  10  2019

69 քաղաքացի դառնալու է գործազուրկ․ բաց նամակ՝ վարչապետին

69 քաղաքացի դառնալու է գործազուրկ․ բաց նամակ՝ վարչապետին

Դիլիջանի խնամքի և պաշտպանության գիշերօթիկ հաստատության աշխատակիցները բաց նամակ են հղել ՀՀ վարչապետ Նիկոլ Փաշինյանին։ Նամակում ասվում է․

«Սիրելի պարոն վարչապետ

Ենթադրելով ու կարծելով , որ համապատասխան պաշտոնատար անձինք գիշերօթիկ հաստատությունների հետ կապված իրականությունը, Ձեզ սխալ ու ձեւափոխած են ներկայացնում, վերջին հույսի ակնկալիքով, կրկին դիմում ենք Ձեզ, հուսալով, որ ժամանակ կգտնեք, անձամբ կուսումնասիրեք, կարձագանքեք ու դրական լուծում կտաք` մեր ընտանիքների համար կենսական ու գոյապահպան նշանակություն ունեցող, արդարացի խնդրանքին:

Հայտնում ենք Ձեզ, որ ս.թ. հոկտեմբերի 11-ին դարձյալ նախարարությունից իրազեկվեցինք Դիլիջանի խնամքի եւ պաշտպանության գիշերօթիկ հաստատության փակման վերաբերյալ, ինչի հետեւանքով հաստատության 69 աշխատողներ դառնալու ենք գործազուրկ` չկարողանալով հոգալ մեր ընտանիքների տարրական պահանջները:

Մեր սաները կհայտնվեն փողոցում` առաջին հերթին զրկվելով կրթության հնարավորությունից ,որը այնքան կարեւորում եք Դուք, վատթարանալու են նրանց ծնողների առանց այն էլ ծանր պայմանները:

Մեր համառ ջանքերի ու քանիցս ուղղած խնդրանքների արդյունքում, Տավուշի մարզպետը հաստատության աշխատակիցներին հրավիրեց հանդիպման ու երբ ս.թ. հոկտեմբերի 17-ին մեր մի խումբ աշխատակիցները գնացին նրա մոտ՝ մարզպետարան, վստահ լինելով, որ հանդիպելու են մարզպետ Հ.Չոբանյանին, ով կլսի իրենց խնդրանքը եւ համապատասխան հիմնավորումներով այն կներկայացնի կառավարությանը, տեղում անակնկալի եկան, այնտեղ տեսնելով սոցիալական հարցերի նախարարության այս լուծարման ծրագրի պատասխանատուներին եւ WORLD VISION, SOS մանկական գյուղեր, ՀՕՖ կառույցների ղեկավարներին եւ աշխատակիցներին:

Նման ձեւաչափով հանդիպումը անսպասելի էր, որի մասին նախապես իմանալու պարագայում, կարող էինք հանդիպմանը ներկայանալ համապատասխան փաստաթղթային հիմնավորումներով եւ լիարժեքորեն պատճառաբանել մեր խնդրանքը.

հաստատության լուծարման գործընթացը երկարաձգելու, ձմռանը աշխատողներին գործազուրկ չդարձնելու, երեխաների դեռեւս որեւ է ձեւով ոտքի չհանած ընտանիքներին փաստի առջեւ կանգնեցնելու մասին:

Հանդիպման ժամանակ մեր կողմից մանրամասն ներկայացվեցին բոլոր հիմնավորումները եւ բազմաթիվ առաջարկներ Դիլիջանի երեխաների խնամքի հաստատությունը վերակազմավորելու ճգնաժամային, վերականգնողական կամ ցերեկային խնամք իրականացնող հաստատության, սակայն մեզ լսող չկար, ինչպես ասում են, ձայն բարբառո հանապատի:

Մեր երկրի մայր օրենքում` Սահմանադրության մեջ նշված է,որ ՀՀ-ն համարվում է սոցիալական, այսինքն` հասարակական ուղղվածության, նյութական ծանր վիճակում ապրողների շահերի պաշտպանության պետություն, որտեղ պետք է երաշխավորված լինի վերջիններիս իրավունքների ու շահերի պաշտպանությունը: Մենք չենք ուզում համալրել գործազուրկների , նպաստառուների, պետությունից անվճար օգնություն ակնկալողների շարքերը, ընդամենը խնդրում ենք հնարավորություն տալ` մեր աշխատանքով ապրել արժանապատիվ կյանքով:

Հաստատության սաների ծնողները հայտնում են մեզ, որ ոլորտի պետական պատասխանատու անձիք գնում են տները եւ բարոյական ճնշում գործադրելով փորձում են ամեն կերպ համոզել գրել դիմում երեխային հաստատությունից հանելու մասին` տալով տարաբնույթ դատարկ խոստումներ, հաճախ էլ ուղղակի սադրելով` «Դու չես ցանկանում պահել քո երեխային», կամ «Մի շերեփ ճաշ ափսոսում ես քո երեխային» եւ նման այլ ձեւակերպումներ հնչեցնելով, ինչը անթույլատրելի եւ անբարոյական է երեխաների հանդեպ:

Չէ՞ որ գիշերօթիկ հաստատությունները այն միակ օջախներն են Հայաստանում, որտեղ անապահով, քայքայված ընտանիքների երեխաները ոչ միայն ապրում ու խնամվում են, այլ նաեւ անցնում են կրթության, դաստիարակության եւ բազմակողմանի զարգացման ՄԵԾ ԴՊՐՈՑ:

Իրականում այսօրվա դրությամբ ոչ մի փոխարինող կառույց կամ հաստատություն չկա , Հայաստանում գոյություն չունի ոչ խնամատար ընտանիքի ինստիտուտ, ոչ սոցիալական աշխատողի զարգացած ինստիտուտ, ոչ էլ այլ անվճար զարգացման կենտրոններ` անապահով ընտանիքների երեխաներին ներառելու համար:

Հարգելի պարոն վարչապետ,

եւս մեկ անգամ խնդրում ենք Ձեզ հանձնարարել կառավարությանը վերանայելու գիշերօթիկ հաստատությունները փակելու անհիմն որոշումը:

Մենք բոլորս թավշյա հեղափոխության մասնակիցներ ենք, մտահոգ ենք՝ ինչպես մեր ընտանիքների, այնպես էլ մեր պետության բարօրությամբ, թեպետ հաստատակամ ու պատրաստ ենք, սակայն չենք ցանկանում մեր եւ երեխաների շահերը պաշտպանելու համար դիմել ծայրահեղ քայլերի:

Դիլիջանի երեխաների խնամքի եւ պաշտպանության գիշերօթիկ հաստատության ամբողջ անձնակազմ, թվով 69 աշխատակից:

Անձնակազմի եւ ծնողների կողմից ստորագրված նամակի թղթային տարբերակը առկա է եւ գտնվում է հաստատությունում»:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ