Առաջարկել եմ մինչև արտակարգ դրության ավարտը վարձը չվճարելու պատճառով ուսանողներին դուրս չթողնել. Արայիկ Հարությունյան

Բուհերի ռեկտորներին առաջարկել եմ մինչև արտակարգ դրության ավարտը՝ ապրիլի 14-ը, վարձը չվճարելու պատճառով ուսանողներին դուրս չթողնել և ապահովել նրանց ընդգրկվածությունը ժամանակակից տեխնոլոգիաների միջոցով իրականացվող դասընթացներին: Այս մասին ֆեյսբուքյան իր էջում ուղիղ եթերում հայտարարեց ԿԳՄՍ նախարար Արայիկ Հարությունյանը՝ նշելով, թե դիմումներ է ստացել, որոնցով ուսանողները հայտնել են, թե բուհերը պահանջում են վճարել վարձավճարները:

«Ես քիչ առաջ գրություն եմ ուղարկել բուհերի ռեկտորներին, որով առաջարկում եմ հիմք ընդունելով ՀՀ-ում կորոնավիրուսի կանխարգելման համար հայտարարված արտակարգ դրությունը՝ այս ժամանակահատվածում զերծ մնալ ուսման վարձավճարները չվճարելու հետ կապված ուսանողներին ուսումնական գործընթացում չընդգրկելուց»,-մանրամասնեց նախարարը:

Նա առաջարկել է նաև արտակարգ դրության ավարտից հետո սահմանել ուսման վարձի վճարման ժամանակացույց: «Միաժամանակ առաջարկել եմ բուհերին, որ այն ուսանողներին, որոնք նշված ժամակահատվածում պատրաստակամություն կհայտնեն առցանց վճարել ուսման վարձը, նրանց տրամադրել վճարման պայմանների մասին անհրաժեշտ տեղեկատվությունը»,- ասաց Հարությունյանը:

Նախարարը միաժամանակ ուսանողներին կոչ արեց, որ եթե ունեն հնարավորություն, անպայման հիմա վճարեն վարձերը, որովհետև բուհերի եկամուտները, այդ թվում դասախոսների աշխատավարձերը այդտեղից են նաեւ գոյանում:

Մանրամասները՝ տեսանյութում: