24  05  2019

Փաշինյանը ՀՅԴ-ին պատասխան հանրահավաք կանցկացնի․ քաղաքագետ․ Politik.am

Փաշինյանը ՀՅԴ-ին պատասխան հանրահավաք կանցկացնի․ քաղաքագետ․ Politik.am

Ավելի շատ ունենք քաղաքական ուժերի դիրքավորման խնդիր, այս մասին Politik.am-ի հետ զրույցում ասել է քաղաքագետ Երվանդ Բոզոյանը՝ անդրադառնալով երեկ երեկոյան Ազատության հրապարակում կայացած Հ.Յ. Դաշնակցության հանրահավաքին, որն, իրենց խոսքով, դեղին  քարտի ցուցադրում էր կառավարությանը՝ վատ աշխատելու համար:

«Վերջին 1-1,5 տարվա ընթացքում Փաշինյանի դեմ հանրահավաք տեղի չէր ունեցել, որովհետև նա ուներ վարկանիշ, և ոչ մի քաղաքական ուժ չէր պատրաստովւմ որևէ քայլի դիմել, և սա, կարելի է ասել, «առաջին ծիծեռնակն էր», երբ քաղաքական ուժն արդեն սկսել է հանդես գալ Փաշինյանին ընդդիմախոսությամբ»,-նշեց քաղաքագետը: 

Բոզոյանի կարծիքով՝ այդ փաստն ինքնին մտահոգել է Փաշինյանին, որովհետև ինքը 10-15 հոգով կարողացել է բազմահազարանոց ցույցեր կազմակերպել և իշխանություն փոխել, և վախենում է ցանկացած հարթակից՝ լինի դա փոքրաթիվ թե մեծաթիվ.

«Կարծում եմ, որ Դաշնակցության երեկվա հանրահավաքը լրջորեն մտահոգել է Փաշինյանին, և ենթադրաբար, նա, ի պատասխան դրա, կփորձի ավելի մեծ հանրահավաք իրականացնել, որ ցույց տա, թե ժողովրդի մեծ մասը իր կողքին է: Այս ամենը գնում է դեպի ցնցումների, և Փաշինյանն ինքն է տանում այդ ցնցումներին: Դրանք լուրջ վտանգ են ներկայացնելու Հայաստանի համար»: 

Քաղաքագետն ընդգծել է՝ Փաշինյանը փորձելու է պատերազմ հայտարարել բոլոր քաղաքական ուժերին.

«Փաշինյանի վարկանիշն անկում է ապրում, և նա հենց դրանից է վախենում: Չեմ ասի, թե այն աստիճանի անկում է ապրել, որ վերջանում է, բայց, մյուս կողմից, ակնհայտ է, որ ինքն էլ զգում է, որ վարկանիշն անկում է ապրում, որովհետև երկրում որևէ լուրջ փոփոխություն չի կատարվել: Միայն ցնցումներ են:

Մարդիկ հեռուստացույցով անընդհատ վատ լուրեր են լսում, ցնցումներ են տեսնում, բռնություն են տեսնում, կենսամակարդակը չի լավանում, սառնարանը չի լցվում, սոցիալական կյանքը չի լավանում: Այս ամենը թատրոն է մեկ անձի համար: Հասարակության մեծ մասը արդեն սկսել է հասկանալ, որ հեղափոխական էյֆորիան միֆ էր, և երբ այդ միֆն արդեն ամբողջական լինի, Փաշինյանը լուրջ պրոբլեմներ կունենա: Ինքը փորձում է ամբողջական իշխանությունն իր ձեռքը վերցնել, որպեսզի վախի մթնոլորտ մտցնելով կարողանա պաշտպանվել»,-ամփոփել է Երվանդ Բոզոյանը: 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ