30 04 2019

Բացահայտում եմ ԱԺ աշխատակազմի ղեկավարի ստախոսությունը․ Արսեն Բաբայան

Բացահայտում եմ ԱԺ աշխատակազմի ղեկավարի ստախոսությունը․ Արսեն Բաբայան

ԱԺ աշխատակազմի նախկին ղեկավար Արսեն Բաբայանն անդրադարձել է աշխատակազմի ներկայիս ղեկավար Տիգրան Գալստյանի հայտարարություններին՝ կապված նրա հետ, որ ԱԺ աշխատակազմի, հյուրերի պայուսակները պետք է զննող սարքի միջոցով անցկացնեն ոչ միայն ԱԺ մուտք գործելիս, այլև դուրս գալիս:

«Ինչպես խոստացել էի, բացահայտում եմ ՀՀ ԱԺ աշխատակազմի ներկայիս ղեկավար Տիգրան Գալստյանի ստախոսությունը․

Նախ` նրան հորդորում եմ, այսուհետ չփորձել մեր հաշվին (ԱԺ աշխատակազմի նախկին ղեկավար կազմի) ինքնահաստատվել, չփորձել մեր հաշվին կայանալ, ինչպես նաև պետական կառավարման համակարգում իր անփորձությունը չփորձել մեր ուսերին փաթաթել (Ջորջ Օրուելի ականջը կանչի): Այսպիսով․

Սուտ թիվ 1.Լրագրողի հարցին՝ «Ո՞վ է որոշել, որ լրագրողների, ինչպես նաև ԱԺ աշխատակազմի, հյուրերի պայուսակները պետք է զննող սարքի միջոցով անցկացնել ոչ միայն ԱԺ մուտք գործելիս, այլ նաև դուրս գալիս, ո՞վ է խորհրդարան մտնող-դուրս եկող բոլոր մարդկանց մեջ պոտենցիալ «գող» տեսնում» աշխատակազմի ներկայիս ղեկավարը պատասխանել է՝ «Ախր, գլոբալ առումով Դուք մի բան եք ասում, որ իրականում նախկին որոշումն այդ մասով փոփոխության չի ենթարկվել պարզապես նախկինում չի պահպանել ներքին ռեժիմը»:

Բացահայտում․Նշված կարգավորումն ամբողջությամբ փոփոխվել է ՀՀ ԱԺ նախագահ Արարատ Միրզոյանի 2019թ.-ի փետրվարի 12-ի ՆՈ-01-Լ որոշմամբ: Մասնավորապես, մեր ղեկավարման ժամանակ գործող կարգավորման համաձայն՝ անձանց մուտքն (ելքն) իրականացվում էր համապատասխան սարքերով սահմանված կարգով զննում անցնելուց հետո, իսկ այդ կարգը սահմանում էր, որ անձանց պայուսակները զննում անցնում են միայն մուտք գործելիս: Նոր ղեկավարության կողմից կատարված փոփոխությամբ սահմանվել է, որ անձանց մուտքը (ելքը) իրականացվում է համապատասխան տեխնիկական սարքերով պարտադիր զննում անցնելուց հետո: Այսինքն` փաստ է, որ անձանց ելքի ժամանակ պայուսակների զննումը պարտադիր է դարձվել հենց Տիգրան Գալստյանի կառավարման օրոք, 2019թ-ի փետրվարի 12-ից:

Սուտ թիվ 2.ԱԺ աշխատակազմի ներկայիս ղեկավարը հայտնել է, թե իբր՝ «… Մենք մի քանի որոշում ենք փոփոխության ենթարկել, օրինակ՝ էլեկտրոնային սարքերի՝ տեխնիկական միջոցով մտնելու հետ կապված է եղել, ինչ մեքենաներ կարող են թույլ տալ շենք մտնել, ինչպես նաև, որ փոխնախարարերն առանց անցագրի կարողանան ներս մտնել, որովհետև նախկինում եկել, ժամերով սպասել են: Եթե նախկինում նախարարները մուտք են գործել մեքենաներով ԱԺ տարածք, հիմա այդ մասն էլ է հանված, միայն հատուկ պաշտպանվող անձինք են՝ դատախազ և այլն, անվտանգության խորհրդի անդամներ»:

Բացահայտում․Բացահայտ սուտ է այն պնդումը, թե նախկինում նախարարները մուտք են գործել մեքենաներով: Այդպիսի իրավունք ունեցող նախարարներից են եղել միայն պաշտպանության և արտաքին գործերի նախարարները, որոնք, ներկայումս, կատարված փոփոխություններից հետո էլ շարունակում են ունենալ այդ իրավունքը: ԱԺ-ում հավատարմագրված լրագրողները կփաստեն, որ մեր ղեկավարման ժամանակ մշտապես տեսել են, որ նախարարներն ԱԺ տարածք են մտել բացառապես ոտքով, և մինչև շենք մտնելն էլ նույն լրագրողները բազմիցս զրուցել են քայլող նախարարների հետ: Մեր ղեկավարման ընթացքում չի եղել որևէ դեպք, որ փոխնախարարը ժամերով սպասի անցագրի: Չի եղել այն պարզ պատճառով, որ կառավարության ներկայացուցիչների մուտքի հետ կապված հարցերը լուծվել են ՀՀ ԱԺ-ում կառավարության ներկայացուցչի միջոցով, և լուծվել են մշտապես շատ օպերատիվ, քանի որ փոխնախարարներին տրվել են շենք մուտք գործելու երկարաժամկետ անցագրեր:

Բացի վերոգրյալից, Տիգրան Գալստյանը, վերջերս մամուլում անդրադառնալով մեր կառավարման տնտեսումներին, դրանք փորձել է դնել կասկածի տակ: Խոսելով մեր տնտեսումներից՝ նա առնվազն պետք է տեղեկացված լիներ, որ իրեն սպասարկող Տոյոտան, ինչպես նաև ևս երեքը, Մերսեդես միկրոավտոբուսը, որոնք առկա են ԱԺ աշխատակազմի հաշվեկշռում, և մի շարք այլ գույք, նախատեսված չեն եղել 2018 թվականի բյուջով և ձեռք են բերվել բացառապես տնտեսումների հաշվին:

Բարեկամաբար խորհուրդ․ պարոն Գալստյան, եթե Ձեզ չի հաջողվում մեզնից լավ աշխատել, ապա դրա պատճառները փնտրեք բացառապես Ձեր մեջ: Մենք միայն ուրախ կլինենք, որ Ձեզ հաջողվի մեր ստեղծածն էլ ավելի զարգացնել, իսկ կիսատ մնացածները՝ ավարտին հասցնել: Երբեմն խորհրդակցեք աշխատակազմի աշխատողների հետ, որոնց գերակշիռ մեծամասնությունը պրոֆեսիոնալներ են:

Իսկ վերջում, ցիտում եմ հանրահայտ հորդորը՝ «հանգի՛ստ նստեք տեղներդ», բայց և աշխատեք․․․»,- գրել է Արսեն Բաբայանը։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ