Կարմիր գծին ենք մոտենում. քաղաքագետը՝ Մամեդյարովի հայտարարության մասին

Քաղաքագետ Ստեփան Դանիելյանը ֆեյսբուքյան իր էջում գրում է. «Մամեդյարովը հայտարարել է, որ Հայաստանն ու Ադրբեջանը փոխըմբռնման են հասել: Նորից ուշադրություն դարձրեք Մնացականյանի հայտարարության վրա, որ Հայաստանի համար գլխավոր խնդիրը բնակչության անվտանգությունն է, ոնց զգում եմ, Արցախի անկախության հարցը հանվում է:

Կարմիր գծին ենք մոտենում: ՔՊ անդամները պետք է հասկանան, որ եթե իրոք այդպես է, իրենք ևս դրա հեղինակներն են դառնում:

Զգացողությունն այնպիսին է, որ Նիկոլի այն բանաձևը, որ Հայաստանն իր մասով է բանակցելու, իսկ Արցախը իր մասով, իսկ որոշումը ժողովուրդն է ընդունելու հետևյալն է`. Հայաստանը (Նիկոլը) իր որոշումն է ընդունելու, Արցախին էլ ասելու են գնա ինչ ուզում ես արա, քո պրոբլեմն է:

Քաղաքական սերնդափոխության իմաստն էլ այն էր, որ հիմնականում անկապ ու պատահական մարդկանցով են խորհրդարանը լցրել, որ ինչ ուզեն անցկացնեն:

Հեղափոխության իմաստն էլ սկսվում է փոխվել, մոտենում ենք դավադրության տեսություններին»:

Հիշեցնենք, որ Ադրբեջանի արտաքին գործերի նախարար Էլմար Մամեդյարովը մեկնաբանել է իր և ՀՀ ԱԳՆ Զոհրաբ Մնացականյանի Միլանում կայացած վերջին հանդիպումը։

Ադրբեջանի ԱԳՆ-ն հայտարարել է, որ Հայաստանն ու Ադրբեջանը երկար ժամանակ անց առաջին անգամ կարողացել են որոշակի փոխըմբռնման գալ Լեռնային Ղարաբաղի հակամարտության հարցում։