Ստանիսլավ Զասի՝ ՀԱՊԿ գլխավոր քարտուղարի պաշտոնում լինելը Հայաստանի համար դրական փաստ չէ. փորձագետ

Աստանայում Բելառուսի անվտանգության խորհրդի պետքարտուղար, գեներալ-լեյտենանտ Ստանիսլավ Զասի հետ հանդիպման ժամանակ Ղազախստանի նախագահ Նուրսուլթան Նազարբաևն իր աջակցությունն է հայտնել նրան՝  որպես ՀԱՊԿ գլխավոր քարտուղարի պաշտոնի թեկնածու, հայտնում է ՌԻԱ «Նովոստի» գործակալությունը:

«Դուք զինվորական եք և համապատասխան կրթություն ունեք: Աշխատել եք գլխավոր շտաբում, Բելառուսի Հանրապետության անվտանգության խորհրդում: Դուք ծանոթ եք ՀԱՊԿ-ի աշխատանքին, մասնակցել եք տարբեր հանդիպումների և համաժողովների: Մենք ձեզ կաջակցենք»,- ասել է  Ղազախստանի նախագահը:

Ռազմական փորձագետ Վան Համբարձումյանը լրագրողների հետ զրույցում վստահեցրեց, որ Ստանիսլավ Զասի՝ ՀԱՊԿ գլխավոր քարտուղարի պաշտոնում լինելը Հայաստանի համար, մեղմ ասած, դրական փաստ չէ: 

«Զասն ավարտել է Բաքվի բարձրագույն համազորային հրամանատարական ուսումնարանը: Նա ադրբեջանամետ գործիչ է, ընկերական կապեր ունի Իլհամ Ալիևի հետ: Ավելին` այն մարդն է, որի միջնորդությամբ, ավելի ճիշտ՝ նախաձեռնությամբ է տեղի ունեցել  Ադրբեջանին բելառուսական  «Պոլոնեզ» համազարկային կրակի ռեակտիվ համակարգի վաճառքի գործարքը: Մինչ գործարքի կնքումը, նա 4 օր եղել է Բաքվում: Բելառուսի նախագահը չի ցանկացել վաճառել իրենց այդ մահացու զինատեսակը որևէ երկրի, սակայն Ստանիսլավ Զասը մեծ հեղինակություն ունի Լուկաշենկոյի մոտ և կարողացել է համոզել նրան: Նման մարդու՝ ՀԱՊԿ գլխավոր քարտուղարի պաշտոնում նշանակվելը վտանգավոր է Հայաստանի համար կամ առնվազն որևէ լավ բանի չի հանգեցնի»,- ասաց ռազմական փորձագետը:

Անդրադաձնալով հայ-ռուսական հարաբերություններին փարձագետը նշեց, որ նախկինում հարաբերությունները բոլորովին այլ մակարդակի էին, հիմա՝ այլ: «Ժամանակին ռուսական կողմը մեծ ճնշումների միջով է անցել, երբ Հայաստանին «Իսկանդեր»-ի մատակարարման հարցն  էր լուծում»,- ասաց ռազմական փորձագետը:

Ըստ նրա` նախ` մեծ աղմուկ բարձրացրեց Ադրբեջանը, ապա` Թուրքիան, որովհետև Թուրքիայի համար էլ է դա վտանգ ներկայացնում, բայց ՌԴ-ն, վստահելով հայկական կողմին,  վաճառեց «Իսկանդեր»-ը, որն այն զինատեսակն է, որ շատ երկրներ երազում էին ձեռք բերել, բայց Ռուսաստանը Հայաստանին տվեց, երբ անգամ Ասադին է մերժել: Իսկ հիմա` մայիսից  սպառազինություն չի մտել Հայաստան: Ռուսական կողմն այսօր վստահություն չունի մեր հանդեպ: Նայեք՝ Պուտինը մինչ օրս Փաշինյանին չի շնորհավորել, երբ անգամ Քոչարյանի ծնունդ է շնորհավորել»,- շեշտեց փորձագետը:

Նրա պնդմամբ` Բաքվի գնած բելառուսական «Պոլոնեզ»-ը որոշ դեպքերում իր բնութագրով գերազանցում է «Իսկանդեր»-ին: ««Պոլոնեզ»-ը միաժամանակ կարող է 8 թիրախ խոցել, իսկ «Իսկանդեր»-ն ունի 2 հրթիռ, որոնք արձակելուց հետո պիտի լիցքավորվի: Հակահրթիռային պաշտպանության համար ավելի հեշտ է պայքարել «Իսկանդերի» դեմ, քան «Պոլոնեզի», քանի որ այն նախատեսված չէ ռեակտիվ արկերի դեմ պայքարելու համար»,- ասաց Վան Համբարձումյանը:

Ինչ վերաբերում է Սու-30ՍՄ կործանիչների մատակարարմանը, փորձագետը շեշտեց, որ սրա շուրջ բանակցությունները սկսվել են դեռևս նախորդ իշխանությունների ժամանակ: Ըստ նրա՝ ռազմական նպատակահարմարության տեսանկյունից դրանց ձեռք բերումն անհիմն ծախս է: «Դա զուտ գովազդ է, ռազմական տեսանկյունից անիմաստ: Դրա փոխարեն կարելի էր ռուսական անօդաչու սարքեր գնել, ռադիոէլեկտրոնիկայի միջոցներ»:

Համբարձումյանը նաև նշեց, որ եթե Նիկոլ Փաշինյանի խոստացած հավելյալ 2.5 միլիարդ դոլարն առաջիկա հինգ տարում ներդրվի  ՀՀ ԶՈւ-ում և ճիշտ նպատակի համար ծախսվի, ապա Հայաստանին կհաջողվի ինչ-որ չափով սպառազինությունների  հավասարակշռությունը վերականգնել: