10 12 2018

Սա պարտություն է, սակայն ոչ` մեր ընտրողների․ ՀՅԴ հայտարարությունը

Սա պարտություն է, սակայն ոչ` մեր ընտրողների․ ՀՅԴ հայտարարությունը

Հայ Յեղափոխական դաշնակցությունը հայտարարություն է տարածել՝ կապված արտահերթ խորհրդարանական ընտրությունների արդյունքների հետ․ 

«Արտահերթ խորհրդարանական ընտրությունների արդյունքում Հայ Յեղափոխական Դաշնակցությունը ներկայացված չի լինի Հայաստանի Հանրապետության 7-րդ գումարման Ազգային Ժողովում:

Սա պարտություն է, սակայն ոչ` մեր ընտրողների: Եվ այս պարտության մեջ մենք տեսնում ենք հետևյալը.

  • Ընտրողն այսօր իր ձայնը տվեց անհատին, ոչ գաղափարին ու ծրագրին,
  • Ընտրության մասնակիցների մի ստվար զանգվածն այսօր կենտրոնացած է «ներքին թշնամու» կերպարի վրա ու ապշելու աստիճան անհոգ է արտաքին և ներքին վտանգներին հանդիման,
  • Դաշնակցության մոտեցումներն այսօր ընկալվում են փոքրամասնության կողմից,
  • Պատշաճորեն չի կարևորվում արցախյան գործոնը քաղաքական օրակարգում,
  • Ձևավորվում է Ազգային ժողով` առանց հստակ գաղափարական և ազգային դիմագծի:

 Այս կարճատև քարոզարշավը նաև կարևորվեց նրանով, որ մենք՝

  1. Ստացանք իրատեսական պատկերացում համակիրների այն բանակի մասին, որը կմասնակցի մեր պայքարին: Այդ բանակը փոքրաթիվ է, բայց փոխարենը իրական, նրա որոշումը հստակ է, ոչ մոդայիկ և թելադրված է միայն ու միայն ներքին համոզմամբ ու հստակ գիտակցությամբ: Ոչ մի անգիտակից քվե, ոչ մի պատահական մարդ:
  2. Կարողացանք բանավիճել, բարձրաձայնել մեր մտահոգությունները, հակադարձել վտանգավոր միտումներին, բերել մեր փաստարկները: Այս պահին մեր խոսքը լայն ընկալում չունեցավ ու թերագնահատվեց, սակայն մեզ հաջողվեց ցույց տալ իրավիճակն անտեսված կողմից, մտածելու ու վերլուծելու առիթ ստեղծել ու արթնացնել զգոնությունը: Ժամանակի ընթացքում անկողմնակալ, հայրենիքի ճակատագրով մտահոգ ու Արցախի հիմնախնդրի նշանակությունը ճիշտ պատկերացնող մեր քաղաքացիները կհամադրեն ամեն օր ստացվող նորությունները մեր հնչեցրած մտահոգությունների հետ և կգիտակցեն, թե ինչի մասին էինք խոսում, ահազանգում:

 Մենք շնորհակալ ենք ՀՅԴ-ին կողմ քվեարկած քաղաքացիներին, 

Մենք շնորհակալ ենք մեր երիտասարդներին՝

  • անմնացորդ նվիրումի ու կրակոտ էներգիայի համար,
  • մեր ընդհանուր գործի մեջ հոգի դնելու համար,
  • հայության ամենաազգային և ամենապատասխանատու կազմակերպության հետ իրենց կյանքը կապելու համար:

 Շնորհակալ ենք մեր շարքերին՝

  • ամենօրյա հետևողական աշխատանքի,
  • տարիներով ապացուցված հավատարմության,
  • խստապահանջության, դիտողությունների, բայց և կարգապահության համար:

 Փակվում է պատմության այս փուլը ու գալիս է նորը: Մենք մուտք ենք գործում այդ նոր պատմության մեջ համազգային կուռ կառույցով, ապագայի մեր երազանքով ու պայքարելու վճռականությամբ:

 

Հայ Յեղափոխական Դաշնակցություն

10 դեկտեմբեր 2018թ.»։

Հիշեցնենք, որ ընտրությունների արդյունքներով, ՀՅԴ-ն դուրս է մնում խորհրդարանից։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ