30  11  2018

Փաշինյանը թվարկեց վերջին 6 ամիսներին կատարված քայլերը

Փաշինյանը թվարկեց վերջին 6 ամիսներին կատարված քայլերը

Այլևս երբեք ՀՀ քաղաքացու ձայնը չի կեղծվելու, այլևս երբեք լկտիություն չի լինելու, այլևս երբեք ՀՀ քաղաքացու վրայով ավտոներ չեն քշելու, կներեք գրոտեսկային համեմատության համար: Այս մասին նոյեմբերի 30-ին, Հրազդան քաղաքում բնակիչների հետ հանդիպման ժամանակ նշեց վարչապետի պաշտոնակատար Նիկոլ Փաշինյանը:

Նա թվարկեց, թե ինչ է տեղի ունեցել Հայաստանում վերջին 6 ամսվա ընթացքում.

«- 10 և 20 դրամով էժանացել է գազն ու լույսը սոցիալապես անապահով խմբերի համար որոշակի չափաքանակներով:

- Ի հեճուկս նախկինում կառավարության կնքած պայմանագրերի, խմելու ջուրը ՀՀ-ում չի թանկացել, թեև այս դեկտեմբերին պետք է թանկանար: Մինչև 2024 թվականը չի թանկանալու:

- 209 հազար մարդու աշխատավարձ բարձրացել է, ևս 200 հազար մարդու աշխատավարձ կբարձրանա 2019 թվականի ընթացքում,

- 85 հազար մարդու նպաստ ու թոշակ կավելանա հունվարի 1-ից:

- «Բնակարան երիտասարդ ընտանիքներին» ծրագրով հիփոթեքային վարկի տոկոսներն իջել են աննախադեպ ցածր մակարդակի:

- Բարձրացել են անշարժ գույքի գները ամբողջ հանրապետությունում: Սա նշանակում է, որ մարդիկ կարող են ավելի մեծ չափով վարկ ստանալ:

- 125 հազար մարդու վարկային պատմությունը մաքրվել է:

- Երկրորդ երեխայի ծննդի համար միանվագ նպաստը եռապատկվել է:

- 38 հազարով ավելացել է գրանցված աշխատողների թիվը:

- վերացել են տնտեսական մենաշնորհները:

- ՔԿՀ-ներում գերբեռնվածության խնդիրը լուծվել է:

- Երթևեկության կանոնների խախտման տուգանքների համաներում է տեղի ունեցել 150 հազար մարդու նկատմամբ, ներվել է 13 մլրդ դրամ:

- Սրտի ստենտավորման գները նվազել են 250 հազար դրամով:

- 2019 թվականից 200 հազար քաղաքացիներ առողջապահությունից կօգտվեն սոցիալական փաթեթի չափանիշներով:

- Երկրում վերացել է համակարգային կոռուպցիան:

- Երբեմնի օլիգարխիան զրկված է կառավարության որոշումների վրա ազդեցության բոլոր լծակներից:

- Վերջին 24 տարվա ընթացքում առաջին անգամ երկրում ընտրությունները չեն կեղծվում:

- Երկրում քաղբանտարկյալներ չկան, 60 տոկոսով գերակատարվել է ճանապարհաշինությունը,

- Զբոսաշրջության 8,8 տոկոս աճ է արձանագրվել:

- Հանրության առջև բացվել են Բաղրամյան 26-ի եև Ազգային ժողովի դարպասների դռները:

- Ոստիկանության զորքերը ոչ թե քաղաքացիներին են ջարդուփշուր անում, այլ մասնակցում են սահմանների պաշտպանությանը:

- Այս պահին ունենք ներգաղթ, արտագաղթի փոխարեն:

- 7 ամիսների ընթացքում 7 միլիարդ դրամի համայնքային ծրագրեր են իրականացվել և հիմա շարունակվում են,

- Հայ-ադրբեջանական սահմանին լարվածությունն ընկել է աննախադեպ ցածր մակարդակի և այս տարի հակառակորդի կրակոցներից զոհվածների աննախադեպ ցածր թիվ ունենք:

- Բաղրամյան 26-ը կրկին լինելու է նախագահի նստավայր:

- Բացառվել է պատմամշակութային հուշարձանների քանդումը:

- Քննչական մարմինները գործում են անկաշկանդ, ըստ նրա՝ առաջիկա օրերին նոր բացահայտումներ կլինեն:

- Հայաստանում տնասպորտային ուղերորահոսքը 12 տոկոսով աճել է»:

Փաշինյանը նաև հայտարարեց, որ բոլոր այն խնդիրները, որ այս կառավարության առաջ դրված են եղել, լուծվել են.

«Մենք հանձնված ենք ժողովրդի դատին, ժողովուրդը պետք է որոշի, թե արդյոք ուզում է, որ մենք կառավարենք Հայաստանն իր անունից: Ես համոզված եմ, որ մենք կլինենք լավ եւ արդյունավետ կառավարություն: Բայց այն պահին, երբ որոշեք, որ չեք ուզում, որ մենք լինենք կառավարություն, մենք ներողություն կխնդրենք, լուռ կհեռանանք և կզիջենք այն քաղաքական ուժին, որն այդ պահին կարժանանա ձեր վստահությանը»,-ընդգծեց Փաշինյանը:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ