10  10  2018

Սամվել Ֆարմանյանի ելույթը ԵԽԽՎ-ում՝ մարդու իրավունքների մոնիթորինգի մասին

Սամվել Ֆարմանյանի ելույթը ԵԽԽՎ-ում՝ մարդու իրավունքների մոնիթորինգի մասին

ԱԺ «ՀՀԿ» խմբակցության պատգամավոր, Եվրոպայի խորհրդի խորհրդարանական վեհաժողովի Իրավական հարցերի և մարդու իրավունքների հանձնաժողովի փոխնախագահ Սամվել Ֆարմանյանը, ելույթ ունենալով ԵԽԽՎ-ում, խոսել է Մարդու իրավունքների մոնիթորինգի շուրջ զեկույցի մասին:

Ինչպես Ֆարմանյանը նշել է, զեկույցի նպատակն է առավելագույնի հասցնել Մարդու իրավունքների հարցում Եվրոպայի խորհրդի և ՄԱԿ-ի մեխանիզմների ազդեցությունն ու արդյունավետությունը:

«Մարդու իրավունքները համամարդկային են իրենց տեսակով, և չպետք է լինի մի երկիր կամ տարածք, անկախ իր քաղաքական կարգավիճակից, որտեղ մարդու իրավունքները հասանելի չլինեն մոնիթորինգի համար»,- ասել է Ֆարմանյանը։ 

«Խոստումնալից է, որ վեհաժողովը ողջունում է այսպես կոչված՝ «գորշ գոտիների» պատրաստակամությունը՝ համագործակցելու ՄԱԿ-ի Մարդու իրավունքների բարձրագույն հանձնաժողովի և Մարդու իրավունքների մոնիթորինգ իրականացնող այլ կառույցների հետ, որոնք նպատակաուղղված են մարդու իրավունքների առավել լավ պաշտպանության ապահովմանը հակամարտության գոտիներում: Դա վերաբերում է նաև դեռևս միջազգային ճանաչում չունեցող Լեռնային Ղարաբաղին»,- ընդգծել է Ֆարմանյանը:

Ֆարմանյանի խոսքով՝ մարդու իրավունքների պաշտպանությունը կարող է հիմնաքար դառնալ հակամարտությունների քաղաքական կարգավորման համար:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ