Եթե մարդիկ մեծ կարողությունների տեր են, չի նշանակում՝ գող են կամ ավազակ. Արա Բաբլոյան

Եթե քաղաքական ուժերը գան կոնսենսուսի և որոշեն ընտրական օրենսգրքում որոշակի փոփոխություն կատարել, պետք է կատարել: Այս մասին մայիսի 25-ին ԱԺ-ում լրագրողների հետ ճեպազրույցում հայտարարեց ԱԺ նախագահ Արա Բաբլոյանը: Նա նշեց, որ բոլոր փոփոխությունները պետք է արվեն քննարկումի արդյունքում: Բաբլոյանը նշեց, որ ՀՀԿ-ն միշտ պատրաստ է և արդեն հայտարարել է, որ կնպաստի բոլոր դրական փոփոխություններին:

Պատասխանելով ընտրական օրենսգրքում փոփոխությունների հնարավորության մասին հարցին՝ նա ասաց, որ այս պահին խորհրդարանը լուծարելու հիմքեր չկան:

Անդրադառնալով հարցին` արդյոք օրակարգում կա ՀՀԿ նախագահ Սերժ Սարգսյանի փոփոխության հարցը, Բաբլոյանը պատասխանեց, որ նման հարց չկա:

Խոսելով վարչապետ Նիկոլ Փաշինյանի հետ ունեցած հարաբերություններից, խորհրդարանի նախագահը նշեց.

«Մարդկային առումով մեր հարաբերությունները երբեք սուր չեն եղել: Ինչպես բոլոր երկրներում և հասարակություններում, մեզ մոտ նույնպես ամեն բան կանոնակարգված է : Ես անձամբ, որպես ԱԺ նախագահ ԱԺ-ի հարցերը կանոնակարգելիս և կազմակերպելիս հավասար եմ մոտենում բոլոր խմբակցություններին և պատգամավորներին, որպես ՀՀԿ խմբակցության անդամ ունեմ այն դիրքորոշումը, որն ունի կուսակցությունը»:

Անդրադառնալով ապօրինի հարստացած պաշտոնյաների վերաբերյալ բացահայտումներին, Բաբլոյանը նկատեց.

«Պետք է հարգենք այն մարդկանց իրավունքն, ովքեր որ հարկեր են վճարում և այս պետությունը զարգացնում են, եթե մարդիկ գործարար են և մեծ կարողությունների տեր` չի նշանակում նրանք գող են կամ ավազակ են, նշանակում է նրանք ավելի մեծ մասնակցություն ունեն մեր երկրի զարգացմանը»: