Վահրամ Բաղդասարյանը՝ չկայացած բանակցությունների մասին

Բանակցությունները պետք է լինեն առանց լրատվամիջոցների, ազատ խոսակցության արդյունքում, ինչպես բանակցեցին Նիկոլ Փաշինյանն ու Գագիկ Ծառուկյանը: Այս մասին ապրիլի 27-ին ԱԺ-ում լրագրողների հետ զրույցում ասաց ՀՀԿ խմբակցության ղեկավար Վահրամ Բաղդասարյանը՝ անդրադառնալով Կարեն Կարապետյանի և Նիկոլ Փաշինյանի բանակցությունների տապալմանը:

Նա հիշեցրեց, որ իրենք ՀՀ նախագահին կոչ են արել, որպեսզի քաղաքական կոնսուլտացիաներ կազմակերպի. «Մենք բաց ենք բանակցությունների համար և ցանկացած օրակարգային հարց պատրաստ ենք քննարկել: Բայց մենք ուլիտմատումների, պարտադրանքների չենք գնալու և նման բանակցություն անվանված ֆորմատով չենք գնալու»:

Դիտարկմանը, որ Նիկոլ Փաշինյանը հորդորել է ժողովրդին մայիսի 1-ին՝ վարչապետի ընտրության օրը, հեղեղել Երևանի փողոցները, փակել ԱԺ-ն, Բաղդասարյանն արձագանքեց. «Մենք գնալու ենք սահմանադրական ճանապարհով, եթե դա է իր սահմանադրական ճանապարհը թող ինքը այդպես վարվի»:

Հարցին, թե դա չի՞ տանի բախումների, Վահրամ Բաղդասարյանը նշեց, որ եթե մտավախություն չունենային, վաղուց գնացած կլինեին բախումների: