Շնորհավորանքներ ու գնահատականներ՝ Արմեն Սարգսյանի ընտրվելու առիթով

Արցախի Հանրապետության Նախագահ Բակո Սահակյանը մարտի 2-ին շնորհավորական ուղերձ է հղել Արմեն Սարգսյանին՝ Հայաստանի Հանրապետության նախագահ ընտրվելու կապակցությամբ: Բակո Սահակյանը հույս է հայտնել, որ Արմեն Սարգսյանի ժամանակաշրջանում կշարունակվի Հայաստանի Հանրապետության զարգացումն ու զորացումը, կամրապնդվի Հայաստան-Արցախ-Սփյուռք եռամիասնությունը, կյանքի կկոչվեն բազմաթիվ ռազմավարական ծրագրեր:

Պաշտոնական այցով  Հայստանում գտնվող Վրաստանի վարչապետ Գեորգի Կվիրիկաշվիլին նույնպես ողջունել է Հայաստանի նախագահական ընտրություններում Արմեն Սարգսյանի հաղթանակը: Նա նշել է, որ Արմեն Սարգսյանին վաղուց է ճանաչում և Հայաստանին շնորհավորել է այս հաղթանակի համար:

Ռուսաստանի ԱԳՆ պաշտոնական ներկայացուցիչ Մարիա Զախարովան նույնպես անդրադարձել է այս իրադարձությանը: Պատասխանելով Հայաստանի Հանրապետության նոր նախագահի հետ հարաբերություններ կառուցելու մասին հարցին՝ նա նշել է, որ համապատասխան հայտարարություններ անելը միանշանակ նախագահի աշխատակազմի լիազորությունն է: Հայաստանի հետ ՌԴ հարաբերությունները կրում են պատմական բնույթ, իսկ դրանց վեկտորն ամրագրված է երկկողմ փաստաթղթերում:

ՀՀ չորրորդ նախագահի ընտրությանը արձագանքել են նաև ռուսական և թուրքական լրատվամիջոցները:

Bianet-ը, վկայակոչելով հայկական լրատվամիջոցներ՝ նշել է, որ չի բացառվում՝ Հայաստանի` արդեն նախորդ նախագահ Սերժ Սարգսյանը կարող է դառնալ երկրի վարչապետ:

«Սերժ Սարգսյանը նախագահի պաշտոնը Արմեն Սարգսյանին կհանձնի ապրիլի 9-ին»,- հավելել է կայքը:

Նշենք, որ ռուսական առաջատար ԶԼՄ-ները անդրադարձել են ՀՀ 4-րդ նախագահի ընտրությանը:  Դրանց թվում են` Интерфакс-ը, Газета.ру-ն, Взгляд-ը, Мир 24-ը, РИА Новости-ն, Лента.ру-ն, Известия-ն, НТВ-ն, Вести.ру-ն:

«Գործող նախագահ Սերժ Սարգսյանի լիազրությունները կավարտվեն ապրիլի 9-ին: Նույն օրը կառավարությունը հրաժարական կտա: Նոր նախագահի` պաշտոնը ստանձնելուց հետո երկիրն ամբողջովին կանցնի խորհրդարանական կառավարման ձևին»,- նշում են լրատվամիջոցները: