Ստորագրվել է հայ-ռուսական զբոսաշրջային գործակցության ծրագիրը

Ապրիլի 4-ին Մոսկվայում կայացած Հայ-ռուսական տնտեսական համագործակցության միջկառավարական հանձնաժողովի նիստի շրջանակներում ստորագրվել է «ՀՀ ՏԶՆՆ զբոսաշրջության կոմիտեի եւ Զբոսաշրջության դաշնային գործակալության (ՌԴ) միջեւ 2019-2021թթ․ համատեղ գործողությունների ծրագիրը»:

Փաստաթուղթը ստորագրել են ՀՀ տնտեսական զարգացման եւ ներդրումների նախարարի տեղակալ Ալբերտ Բաբայանը եւ Ռուսաստանի Զբոսաշրջության դաշնային գործակալության ղեկավարի տեղակալ Ալեքսեյ Կոնյուշկովը։

Ծրագիրը միտված է ամրապնդել բարեկամական կապերը երկու պետությունների ժողովուրդների միջեւ եւ նպաստել երկու երկրների տնտեսական զարգացմանը եւ զբոսաշրջային ներուժի աճին։

2019-2021թթ․ համատեղ գործողությունների ծրագրի  նպատակներից է․  

• Հայաստանի Հանրապետության եւ Ռուսաստանի Դաշնության միջեւ զբոսաշրջային հոսքերի ավելացումը, ինչպես նաեւ Հայաստանի Հանրապետության եւ Ռուսաստանի Դաշնության միջեւ զբոսաշրջային փոխայցելությունների հետ կապված ընթացակարգերի դյուրացումը,
• հայաստանյան եւ ռուսաստանյան զբոսաշրջային կազմակերպությունների միջեւ կապերի հաստատումը,
• զբոսաշրջության ոլորտում մասնագիտացված փորձագետների եւ լրագրողների փոխանակումը,
• երկու երկրների զբոսաշրջային կազմակերպությունների միջեւ զբոսաշրջային եւ հյուրընկալության ոլորտի կադրերի պատրաստման բնագավառում տեղեկատվության եւ փորձագետների փոխանակումը,
• երկու պետությունների զբոսաշրջության ոլորտի կրթական հաստատությունների միջեւ համագործակցության զարգացումը եւ համատեղ կրթական ծրագրերի իրականացումը,
• զբոսաշրջության ոլորտում ներդրումներ իրականացնող հայաստանյան եւ ռուսաստանյան զբոսաշրջային կազմակերպությունների միջեւ համագործակցության զարգացումը:

Միաժամանակ, հաշվի առնելով Հայաստանի առողջարանային եւ վերականգնողական ծառայություններ մատուցող առողջարանների եւ հյուրանոցների մեծ ներուժը եւ ցանկանալով նպաստել առողջարանային զբոսաշրջության զարգացմանն ու  առողջարանների որակի բարձրացմանը՝ միջկառավարական հանձնաժողովի նիստի շրջանակներում պայմանավորվածություն է ձեռք բերվել ռուսական կողմին տրամադրել  ամփոփ տեղեկատվություն Հայաստանի առողջարանային-վերականգնողական կազմակերպությունների վերաբերյալ։