«Իմ քայլը» դաշինքից ովքե՞ր ինքնաբացարկ կներկայացնեն․ «Ժողովուրդ»

«Ժողովուրդ» օրաթերթը գրում է․ «Կամաց-կամաց ուրվագծվում է նոր կառավարության կազմը: «Ժողովուրդ» օրաթերթի տեղեկություններով` այս պահի դրությամբ հայտնի է, որ «Իմ քայլը» դաշինքի ցուցակում ընդգրկված պաշտոնյաներից ինքնաբացարկի դիմումներ կներկայացնեն ՀՀ առողջապահության նախարար Արսեն Թորոսյանը, կրթության և գիտության նախարար Արայիկ Հարությունյանը, բնապահպանության նախարար Էրիկ Գրիգորյանը, տրանսպորտի, կապի և տեղեկատվական տեխնոլոգիաների նախարար Հակոբ Արշակյանը և բոլոր մարզպետները:

Ասել է թե` նրանք չեն գնա խորհրդարան, այլ կպահպանեն նախարարական պորտֆելները:

Հայտնի է նաև, որ Տիգրան Ավինյանը կմնա փոխվարչապետ: Միաժամանակ, որևէ փոփոխություն տեղի չի ունենա ուժային կառույցներում. և´ ԱԱԾ տնօրեն Արթուր Վանեցյանը, և´ ՀՀ ոստիկանապետ Վալերիյ Օսիպյանը կշարունակեն պահպանել իրենց պաշտոնները:

Միաժամանակ, նոր կառավարությունը հիմնական շեշտը դնելու է տնտեսության և տնտեսական հեղափոխություն իրականացնելու վրա` ընդգրկելով տնտեսական գիտելիքներ ունեցող նոր դեմքերի»։

Նյութն ամբողջությամբ կարդացեք «Ժողովուրդ» օրաթերթում։