22 11 2018

Ինչպես աշխատեցնել 800 հազար «թամբալին»․ 7or.am

Ինչպես աշխատեցնել 800 հազար «թամբալին»․ 7or.am

Նիկոլ Փաշինյանը հայտարարել է, որ ինքը դեկտեմբերի 9-ին ակնկալում է ՀՀ քաղաքացիների քվեն, որպեսզի քաղաքական հեղափոխությունից հետո նաև տնտեսական հեղափոխություն լինի: Թեև տնտեսությունը սիրում է կայունություն,այլ ոչ թե հեղափոխականություն, բայց հաշվի առնելով ներկա իրավիճակը՝ կարող ենք հասկանալ, թե ինչու է ամեն ինչից առաջ դրվում «հեղափոխություն» բառը:Կարևորը, տվյալ դեպքում, բովանդակությունն է: Այսինքն՝ կարևորն այն է, թե ինչ բովանդակություն է դրվում «տնտեսական հեղափոխության» մեջ, գրում է 7or.am-ը։

Ո՞րն է Նիկոլ Փաշինյանի տնտեսական տեսլականը

Քաղաքական հեղափոխության ժամանակ ամեն ինչ հստակ էր, պարզ ու նույնիսկ՝ պարզունակ:

Փաշինյանը սկզբում առաջարկեց մերժել Սերժին, իսկ հետո, երբ տեսավ, որ իր իսկ համար անսպասելիորեն ահագին մարդ է հավաքվել, առաջարկեց մերժելուց հետո իրեն վարչապետ նշանակել:

Եթե նա հենց սկզբում, այսինքն՝ Գյումրիում հայտարարեր, որ քայլարշավը սկսում է, որպեսզի վարչապետ դառնա, ապա հայրաքաղաքից Երևան կհասներ իր թիմակիցների ու «Չալո»անունը ստացած շան ուղեկցությամբ, և հասնելուց հետո իր շուրջը հավաքվածների քանակային աճ հազիվ թե տեղի ունենար: Ասել է թե՝ ճիշտ ալգորիթմը գործի հաջողության գլխավոր բանալին է:

Տեսե՛ք, ապրիլ-մայիսյան օրերին քաղաքացուց պահանջվում էր դուրս գալ տանից ու փակել փողոցը, պարբերաբար «գըմփ-գըմփ-հո՛ւ» անել, դատարկ «կաստրյուլային» շերեփով հարվածել, գոռալ «Քա՛յլ արա, մերժի՛ր Սերժին» ու վերջում էլ գոռալ «Նիկո՛լ, վարչապե՛տ»:

Իշխանությունը վերցնելն ամենահեշտ բանն էր: Դժվարն այն պահելն ու երկիրը զարգացնելն է, որպեսզի հետո մեկ ուրիշը քեզ «գըմփ-գըմփ-հո՛ւ» չանի:Ամենամեծ խնդիրը տնտեսություն զարգացնելն է, մարդկանց բարեկեցությունն ապահովելը և որպես գլխավոր արդյունք՝ մեր երկրի անվտանգության մակարդակը բարձրացնելը:

Փաշինյանն ասել է, որ ինքը «իզմերի» կողմնակից չէ: Հետևաբար դժվար է գնահատել, թե նա ի՞նչ մոդել է պատկերացնում ու ինչպե՞ս է փորձելու տնտեսություն զարգացնել: Ոչխար պահելու, մոշ հավաքելու, տաքսի քշելու կոչերը մարդկանց մի մասի համար կարող են ուղենիշ դառնալ և իրոք որոշակի բարեկեցություն ապահովել, բայց չեն կարող հիմք հանդիսանալ բարձր տեխնոլոգիական ու արդյունաբերական երկրի վերածվելու համար, ինչի մասին Փաշինյանն, ի դեպ, պարբերաբար խոսում է՝ հակադրելով իր պատկերացրած այդ տնտեսությունը ներկայիս տնտեսական համակարգին:

Կյանքը դեկտեմբերի 9-ից հետո

Դեկտեմբերի 9-ից հետո, երբ բաղձալի իշխանությունն արդեն ամբողջությամբ նվաճված կլինի, վերջապես պետք է զբաղվել տնտեսությամբ, բայց հարցն այն է, թե ինչպես: Այդ «ինչպես»-ի մասին պետք է հստակ խոսի Փաշինյանը 12-օրյա քարոզարշավի ժամանակ կամ դրանից առաջ, քանզի նա արդեն քարոզարշավի մեջ է:Հասկանալի է, որ քայլերթն ու հանրահավաքն այդ ամենի համար այնքան էլ լավագույն ֆորմատը չեն, բայց քայլելուց հետո, երբ կգա հանգիստ նստելու ժամանակը, արժե ասել, թե ինչն ինչով է փոխվելու, ինչպես է փոխվելու և ինչ կադրերով է այդ ամենն արվելու:

Փաշինյանը վրդովված պնդում էր, որ մեզանում 350 հազար մարդ ճռռում է, որպեսզի պահի 800 հազարին: Մի կողմ թողնելով թվային անճշտությունները՝ կուզենայինք նախըտրական փուլում հայեցակարգային ու ծրագրային մոտեցման մասին լսել, թե ինչպես է, օրինակ, Փաշինյանը պատրաստվում աշխատացնել իր ասած 800 հազար «թամբալին»: Միայն միկրոբիզնեսին հարկերից ազատելով հարցը, բնականաբար, չի լուծվելու:Գլխավոր քաղաքական խնդիրը երկրում համերաշխության մթնոլորտը վերականգնելն է, որից հետո տնտեսական ծրագրերը և հայեցակարգերը կյանքի կոչելը կհեշտանա:

Հնարավոր չէ հարթակից ասֆալտին փռելու կոչեր հնչեցնել, իսկ մյուս կողմից ակնկալել ներդրումներ ու բիզնեսի աշխուժացում:

Ասֆալտին փռվողները հաստատ այն 350 հազարի մեջ են մտնում: Հնարավոր չէ պոպուլիստական նպատակներով նրանց վնասելն ու միաժամանակ ծեփելուց հաճույք ստացող 800 հազարին «թամբալ» համարելը: Այդպիսի վարքագծով կարելի է երկու շերտի հետ հարաբերություններն էլ վատացնել ու ստանալ լավագույն դեպքում զրո տնտեսական արդյունք:

Նյութն ամբողջությամբ կարդացեք 7or.am-ում։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ