Մարդիկ հույսեր ունեն, որ դիմում կգրեմ, բայց չեմ գրել, չեմ էլ գրելու․ ԵՊՀ ռեկտոր․ «Ժողովուրդ»

«Ժողովուրդ» օրաթերթը գրում է․ «Տևական ժամանակ է, ինչ համառորեն լուրեր են շրջանառվում այն մասին, որ Երևանի պետական համալսարանի ռեկտոր Արամ Սիմոնյանը հրաժարականի դիմում է ներկայացրել: Ըստ որոշ տեղեկությունների` նա Հայաստանում նոր քաղաքական իրավիճակի հետ կապված մտադիր է հրաժարական տալ` ազատվելով ռեկտորի պաշտոնից:

Սակայն Արամ Սիմոնյանը այս մասին «Ժողովուրդ» օրաթերթի հարցը լսելուց անմիջապես հետո արձագանքեց. «Սուտ և կեղծ լուրեր են: Այդպիսի բաներ չկան: Այդ մարդիկ շատ մեծ հույսեր ունեն, որ ես դիմում կգրեմ, բայց ես չեմ գրել և չեմ էլ պատրաստվելու գրելու: Ոչ, ես ընտրված ռեկտոր եմ և ունեմ իմ ժամկետը»:

Հիշեցնենք, թավշյա հեղափոխությունից հետո Արամ Սիմոնյանի դեմ «ԵՊՀ ռեսթարթ» նախաձեռնությունը բողոքի ակցիաներ էր անցկացնում` պահանջելով ռեկտորի  հրաժարականը: Սիմոնյանը փորձել էր հանդիպել նախաձեռնության անդամների հետ, բայց այդ հանդիպումը վերածվել էր վեճի, որի ժամանակ ռեկտորի ինքնազգացողությունը կտրուկ վատացել էր ու նա տեղափոխվել էր հիվանդանոց»։

Նյութն ամբողջությամբ կարդացեք «Ժողովուրդ» օրաթերթում։