Արամ Օրբելյանն ընդդեմ Նիկոլ Փաշինյանի հայցադիմումը մակագրվել է դատավոր Սուքոյանին

ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Օրբելյանի հայցադիմումն ընդդեմ վարչապետ Նիկոլ Փաշինյանի մակագրվել է Երևանի ընդհանուր իրավասության դատարանի դատավոր Ալեքսեյ Սուքոյանին: Այս մասին «Փաստինֆո»-ն տեղեկացավ Դատական տեղեկատվական համակարգից:

Հայցադիմումը դատարան մուտք է եղել մարտի 18-ին և նույն օրը մակագրվել Սուքոյանին:

Ավելի վաղ տեղեկացրել ենք, որ Արամ Օրբելյանը դատի է տվել Նիկոլ Փաշինյանին և պահանջում է հերքել զրպարտություն հանդիսացող փաստացի տվյալները և փոխհատուցել զրպարտությամբ պատճառված վնասը:

Դատական հայցի պատճառ է դարձել Փաշինյանի հայտարարությունը: Մարտի 10-ին Քաջարանում «Այո»-ի քարոզարշավի ժամանակ ՀՀ վարչա­պետ Նիկոլ Փաշինյանն ասել էր, որ Արամ Օրբելյանը, ով հանդիսանում է Ռոբերտ Քոչարյանի պաշտպանը «էն ժամանակներում երբ մարտի մեկի հետ կապված գործ էր քննվում ՍԴ-ում, բազմիցս ելումուտ է արել Սահմանադրական դատարան», որը չի արձանա­գրվել սահմանված կարգով։ Այնուհետև հայտարարել է, թե «ոստիկանները բացատրություն են տվել, որ ՍԴ նախագահի օգնականը կամ աշխատակազմի ղեկավարն ասել է՝ շեֆի սանիկն է, թող գա, մի գրանցեք»:

Նշենք, որ դեռևս 2020թ. հունվարի 30-ին հանրային հեռուստատեսության «Լուրերի գլխավոր թողարկման» ընթացքում նմանատիպ (բայց ոչ նույնական) պնդումներով հաղորդում էր հեռարձակվել, ինչի առնչությամբ փետրվարի 29-ին Արամ Օրբելյանը զրպարտություն համար­վող տեղեկատվությունը հերքելու և վնասի հատուցման պահանջով դիմել էր դատարան։ Արամ Օրբելյանը դատական հայց էր ներկայացրել ընդդեմ ԱԱԾ-ի և Հանրային հեռուստաընկերության՝ զրպարտության համար։ Օրբելյանը դատարան է դիմել զրպարտություն հանդիսացող փաստացի տվյալները հերքելու և զրպարտությամբ պատճառված վնասը փախհատուցելու պահանջով։ Հայցադիմումը դատարան մուտք է եղել մարտի 3-ին և նույն օրը մակագրվել է դատավոր Նաիրա Ավետիսյանին, սակայն դատարանը մարտի 17-ին ետ է վերադրաձրել Արամ Օրբելյանի ներկայացրած առաջին հայցադիմումը՝ պատճառաբանելով որ հայցադիմումում բացակայել է Արամ Օրբելյանի ներկայացուցչի հասցեն, այսինքն՝ հայցադիմումը թերի է եղել: Մարտի 18-ին Արամ Օրբելյանը ներկայացրել է երկրորդ հայցադիմումն ընդդեմ ԱԱԾ-ի և Հանրային հեռուստաընկերության, որը կրկին մակագրվել է դատավոր Նաիրա Ավետիսյանին: