Ալեքսանդր Ազարյանը կշարունակի քննել Արմեն Թավադյանի կալանքի բողոքարկումը

Վերաքննիչ քրեական դատարանի դատավոր Ալեքսանդր Ազարյանը մերժեց Արմեն Թավադյանի գործով մեղադրող դատախազի՝ դատավորին ինքնաբացարկ հայտնելու մասին միջնորդությունը: Դատավոր Ազարյանը կշարունակի քննել «5-րդ ալիք» հեռուստաընկերության սեփականատեր Արմեն Թավադյանի պաշտպանի՝ Թավադյանի խափանման միջոց կալանքի որոշման բողոքը:

Դատախազին ներկայացրած բացարկի միջնորդությունը մերժվել է հիմնավոր չլինելու պատճառաբանությամբ: Իսկ Արմեն Թավադյանի կալանքը երկարաձգելու վերաբերյալ բողոքը կքննվի վաղը։ Այս մասին լրագրողների հետ զրույցում ասաց Թավադյանի պաշտպան Արամ Օրբելյանը։

«Դատախազը աշխատանքային ծանրաբեռնվածության պատճառով ներկա չէր, խնդրել էր նիստը հետաձգել: Նիստը հետաձգվեց, այն կշարունակվի վաղը 16:00-ին: Քանի որ նոր հանգամանքներ պետք է ներկայացնենք, որի մասով դատախազը դիրքորոշում պետք է հայտնի, նաև դա էր պատճառը, որ այսօրվա նիստը հետաձգվեց»,- հայտնեց Արամ Օրբելյանը:

Պաշտպանը խոսքով՝ դատախազների և քննիչների բացակայության պատճառով որևէ կալանքի գործի քննության հետաձգումները պետք է նվազագույնի հասցվեն:

Ինչպես ավելի վաղ տեղեկացրել էինք, «5-րդ ալիք» հեռուստաընկերության սեփականատեր Արմեն Թավադյանի կալանքի մասին ընդհանուր իրավասության դատարանի կայացրած որոշումը  պաշտպանական կողմը  բողոքարկել էր Վերաքննիչ քրեական դատարան: Բողոքի քննությունը մակագրվել էր Վերաքննիչ քրեական դատարանի դատավոր Ալեքսանդր Ազարյանին, նախորդ դատական նիստում Հատուկ քննչական ծառայության քննիչը ինքնաբացարկի միջնորդություն էր ներկայացրել: