Ի՞նչ փոփոխություններ են սպասվում վարորդական իրավունք ստանալու ընթացակարգում

ՀՀ փոխոստիկանապետ Հովհաննես Քոչարյանը ֆեյսբուքյան իր էջում անդրադարձել է վարորդական իրավունքի վկայական ստանալու կարգի մասին նոր նախագծին։

«Օրենքի նախագծով ուսուցում պահանջվում է միայն «C» կատեգորիայի /բեռնատար տրանսպորտային միջոցների վարման/ իրավունքի վկայական ստանալու համար:

Հայաստանը պարտավորվել է վարորդական վկայականների տրամադրման կարգը համապատասխանեցնել Եվրապառլամենտի և Խորհրդի 2006 թվականի դեկտեմբերի 20-ի թիվ 2006/126/ԵՀ հրահանգի պահանջներին, ուստի օրինագծի ընդունումը պայմանավորված է պարտավորությունը կյանքի կոչելու անհրաժեշտությամբ: Բացի այդ՝ վարելու իրավունք ստանալու համար ուսուցման գործունեությունը լիցենզավորվելու է: Հայաստանը հիշյալ պարտավորությունները ստանձնել է ԵՄ-Հայաստան համապարփակ և ընդլայնված գործընկերության համաձայնագրի /CEPA/ կիրարկման ճանապարհային քարտեզով»,– նշել է նա:

Հիշեցնենք, որ «Ժամանակ» օրաթերթը գրել էր, որ ՀՀ կառավարությունը շրջանառության մեջ է դրել վարորդական իրավունքի վկայական ստանալու կարգի մասին նոր նախագիծը, ըստ որի՝ այլևս բավարար չէ, որ վարորդական իրավունքի վկայական ստանալու հա­մար քաղաքացին հաջող հանձնի թեսթային և գործնական քննությունները: 

«Նոր կարգի համաձայն՝ քաղաքա­ցին պարտադիր պետք է ներկայացնի ուսուցում իրականացնող կազմակերպու­թյան (այդ թվում՝ ռազմաուսումնական հաստատու­թյան) կողմից տրված վա­րորդական դասընթացների ավարտական քննություննե­րը դրական հանձնելու վերա­բերյալ փաստաթուղթ»,- նշել էր թերթը։