21  05  2019

Ո՞վ է «ստահոդ» տեղեկություն տարածել դատավոր Դավիթ Գրիգորյանի մասին․ Armdaily.am

Ո՞վ է «ստահոդ» տեղեկություն տարածել դատավոր Դավիթ Գրիգորյանի մասին․ Armdaily.am

ArmDaily.amհարցազրույցը Երեւան քաղաքի ընդհանուր իրավասության դատարանի դատավոր, Ռոբերտ Քոչարյանին կալանքից ազատած Դավիթ Գրիգորյանի հետ։

-Պարոն Գրիգորյան, կցանկանայի անդրադառնայիք դատախազության՝ Ձեզ ինքնաբացարկ հայտնելու միջնորդությանը։

-Դատախազությունը ինքնաբացարակի միջնորդություն դեռ չի ներկայացրել, եթե նման մտադրություն ունի, կներկայացնի, կքննարկենք, նման միջնորդություն չի եղել մինչեւ այժմ, եթե կներկայացնի, կքննարկենք։

 -Ի՞նչն է պատճառը, որ մեկ անգամ Դուք ինքնաբացարկ հայտնեցինք, բայց հետո որոշեցիք քննել այդ գործը։ 

-Իմ ինքնաբացարկ հայտնելու հետ կապված որոշումը արդեն իսկ տրամադրվել է կողմերին, դա որեւէ կապ չունի սույն քրեական գործը իմ կողմից վարույթ ընդունելու եւ հետագա ընթացքը լուծելու հետ, դա վերաբերել է մինչդատական վարույթում Քոչարյանի նկատմամբ կիրառված խափանման միջոցի կալանավորումը երկարացնելու միջնորդության հետ, դրանք տարբեր իրավական հարթության վրա հարցեր են։ Երկարացման վերաբերյալ ինքնաբացարկի իմ որոշումը երբ կայացրել եմ, ես կոնկրետ նշել եմ, թե ինչի համար է, այնպես որ դա կապ չունի։ Գործը վարույթ ընդունելուց հետո արդեն որպես գործը քննող դատավոր եմ հանդես գալիս եւ Ձեր կողմից նշված միջնորդության քննարկման հետ կապված որեւէ աղերս չունի իմ հիմիկվա գործունեությունը։

-Գործը ՍԴ ուղարկելու որոշմանը կցանկանայի անդրադառնայիք, որ տուժող կողմը տեղեկացված չի եղել։

-ՀՀ քրեական դատավարության օրենսգրքի 292-րդ հոդվածը գործը դատական քննության նախապատրաստելու փուլի մասին նախատեսում է, որ դատավորը գործը վարույթ ընդունելուց հետո 15 օրվա ընթացքում նյութերին ծանոթանալու ընթացքում կայացնում է մի շարք որոշումներ, այդ թվում՝ քրեական գործի վարույթը կասեցնելու մասին, այդ որոշումները կայացվում են դատավորի կողմից միանձնյա՝ առանց դատական նիստ հրավիրելու, առանց կողմերի կարծիքը լսելու, իմ կողմից գործի վարույթը կասեցնելու եւ ՍԴ դիմելու որոշումը կայացվել է հենց այդ ռեժիմով, այսինքն՝ միանձնյա որոշում է կայացվել, ես պաշտպանական կողմից բերված միջնորդությունները չեմ քննարկել, դրանց հիման վրա չեմ նման որոշում կայացրել, եթե նման միջնորդություն քննարկելիս լինեի, դա նշանակում է, որ ես պետք է դատական նիստի նախապատրաստության փուլում՝ արդեն ըստ էության գործը քննելիս, միջնորդությունների փուլում քննարկեի, կողմերի կարծիքը լսեի, որոշում կայացնեի, բայց դատարանը նաեւ իրավասու է կայացնել միանձնյա որոշում։ 

-Ձեր կայացրած որոշման հետ կապված բազմաթիվ տեղեկություններ շրջանառվեցին՝ սկսած նրանից, որ այդ որոշումը ուրիշ դատավորներ են գրել, Դուք կարդացել եք եւ վերջացրած, որ դատարանի դահլիճում Քոչարյանը Ձեզ հայհոյել է։

-Բացարձակապես ստահոդ տեղեկություններ են, այդ տեղեկությունները հայտնվել են Արտակ Գալստյանի կողմից, ով հայտնի է Վանոյի Արտակ մականվամբ, որի վերաբերյալ ես իմ գործունեության ընթացքում բազմիցս մինչդատական վարույթի հետ կապված կալանավորման միջնորդության եւ կալանավորման երկարացման հարցեր եմ քննել եւ բավարարել եմ կալանքի տակ մնալու ժամկետները, կարծում եմ՝ Ձեզ համար հասկանալի է, թե ինչ կապ կարող է լինել Արտակ Գալստյանի կողմից նման իրականությանը չհամապատասխանող եւ դատարանին անվանարկող տեղեկությունների հրապարակումը, այդ կապակցությամբ Վերաքննիչ դատարանի դատավոր Մխիթար Պապոյանը արդեն հանցագործության մասին հաղորդում է տվել, կարծում եմ՝ մեր իրավապահ մարմինները համապատասխան ընթացակարգով հաղորդումը կքննարկեն եւ կպահանջեն, որ Արտակ Գալստյանը նշի այն աղբյուրը, որի հիման վրա նման տեղեկություններ է հայտնել, այլապես նա պատասխանատվություն կկրի համապատասխան հոդվածով։

-Պարոն Գրիգորյան, Քոչարյանին ազատ արձակելիս շարժվել եք միայն օրենքո՞վ, անձեռմխելիության դրո՞ւյթն եք հիմք ընդունել։

-Խափանման միջոցի հարցը քննարկելիս դատարանը, ինչպես ցանկացած հարց քննարկելիս, բացառապես Սահմանադրությամբ իրեն տրված իրավասության շրջանում է հարցի լուծում տալիս եւ այդ որոշումը կայացնելիս ղեկավարվում է առկա փաստական տվյալների գնահատմամբ եւ իր համոզմամբ։ Որոշումը հասանելի է, հիմնավորումները՝ նշված են, չեմ ուզում մեկնաբանել, որովհետեւ դա կարող է դատավորի էթիկայի խախտում դիտվել։

-Դատավորների մուտքերը եւ ելքերը փակելու ակցիան հետեւեց Ձեր որոշմանը, մեղավորության զգացում չունե՞ք։ Եւ ինչպե՞ս եք գնահատում այդ քայլը, արդյոք սա ճնշում չէ՞ր դատարանի վրա։

-Ցանկացած դատավոր որոշումներ կայացնելիս անկախ է՝, եւ ինքն է պատասխանատու իր կողմից կայացված որոշումների համար, թե դրա հետագա զարգացումները ինչ կերպ կարձագանքվեն, կարծում եմ եւ համոզված եմ, որ դատավորի գործունեությանը գնահատելու առումով որեւէ կերպ չեն կարող հիմք հանդիսանալ։ եթե դատարանը անկախ է, կայացնում է այն որոշումը, որը գտնում է՝ օրինական է, պատճառաբանված է, հիմնավորված է, իսկ թե ինչ կլինի դրանից հետո, ես մեկնաբանություններից զերծ եմ մնում, կարծում եմ՝ դուք շատ լավ տեղյակ եք հանրության վերաբերմունքից եւ կարծիքներից։ 

-Դուք երեկ դատարան մտե՞լ եք։

-Իսկ որեւէ դատավոր կա՞, որ կարողացել է այդ իրավիճակում դատարան մտնել։ Եթե նման դատավոր կա, ես տեղյակ չեմ, ուրեմն, կներեք, հալալա էդ դատավորին։

 -Ինչպե՞ս կմեկնաբանեք երեկվա ակցիան։

-Չեմ ուզում մեկնաբանել, որովհետեւ դատարանի լիազորություններից բխող չեմ համարում մեկնաբանումը այն գործընթացների, որոնք տեղի են ունեցել։ 

-Դուք ԲԴԽ դիրքորոշումը եւ գործողությունները համարժե՞ք եք համարում, թե՞ այդ կառույցը անգործության է մատնված։ 

-ԲԴԽ-ն հայտարարությամբ հանդես եկավ, որ դատավորները իրենց աշխատանքը շարունակեն։ 

-Ձեզ բավարարո՞ւմ են ԲԴԽ-ի քայլերը եւ այս իրավիճակում գործողությունները։

- Ես աշխատանքի գնացել եմ, իմ աշխատանքը կատարել եմ, կարծում եմ՝ այդ առումով ԲԴԽ-ն հավասակշռված եւ տեղին հայտարարություն է արել թե իմ, թե իմ կոլեգաների համար։

-Փաշինյանը իր երեկվա ելույթում հայտարարել է, որ պետք է հրաժարական տան այն դատավորները, ովքեր անաչառ, արդար չեն, Դուք Ձեզ այդպիսին համարո՞ւմ եք ու ո՞ր դեպքում հրաժարական կտաք՝ վեթինգ լինելուց առաջ, թե հետո։ 

-Իմ անաչառության եւ արդար լինելու հետ կապված ես պետք չէ, որ գնահատական տամ, դրանք արտահայտված են իմ կողմից կայացված բազմաթիվ դատական ակտերում՝ 6 տարվա իմ գործունեության ընթացքում։ 

-Իսկ վեթինգի ենթարկվելու մասին ի՞նչ կարծիք ունեք։

-Դա այն հարցն է, որը վաղաժամ է քննարկել, երբ Սահմանադրության փոփոխություններ լինի, համապատասխան մեխանիզմները, ընթացակարգերը մշակված լինեն, ամեն մարդ իր կարծիքը կհայտնի։

-Դուք հրաժարական պատրաստվո՞ւմ եք տալ։

-Ինչի՞ համար։ 

-Վերջին իրադարձությունների։

-Հարցին հռետորական պատասխանեմ՝ իսկ Դուք ո՞նց եք կարծում։ 

-Ես չեմ կարծում։ 

-Շնորհակալություն։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ