Ռոբերտ Քոչարյանի գործով նիստն ընդմիջվեց․ շարունակությունը՝ հունվարի 16-ին

Ռոբերտ Քոչարյանի խափանման միջոցի վերաբերյալ նիստը հետաձգվեց մինչև հունվարի 16-ը, առավոտյան 11-ը։ Այս մասին լրագրողներին ասաց Ռոբերտ Քոչարյանի փաստաբան Հայկ Ալումյանը։

Փաստաբանները պնդել են,  որ նախ քննվի իրենց ներկայացրած՝ խափանման միջոցը գրավով փոխարինելու միջնորդությունը, քանի որ այն ավելի շուտ է ներկայացվել։ Դատարանը, սակայն, քննել է կալանքը երկարաձգելու՝ քննիչի միջնորդությունը։

Ներկայացվել են քննիչի փաստարկները, դատախազության գնահատականը, այնուհետև՝ փաստաբանների հակափաստարկները։ Սակայն փաստաբաններն առարկություններն ամբողջությամբ դեռ չեն ներկայացրել։

Հայկ Ալումյանն ասաց, որ փաստաթղթեր և տեսանյութեր պետք է ներկայացնեն դատարանին։

«Մեղադրող կողմը մեղադրանքը կառուցել է այն փաստարկի վրա, թե հանրահավաքները եղել են բացառապես խաղաղ և անզեն։ Հանգամանքներից մեկը, որ պետք է քննվի՝ արդյո՞ք այդ հանրահավաքները եղել են խաղաղ և անզեն։ Հատկապես մարտի 1-ի հանրահավաքը չի եղել խաղաղ և անզեն»,- ասաց Հայկ Ալումյանը։ Տեսանյութից, նրա խոսքով, երևում է, թե ինչպես է քաղաքացիական հագուստով անձ կրակում ոստիկանների ուղղությամբ։ 

Փաստաբանն ասաց, որ դատարանին հարց է ուղղվել՝  Ռոբերտ Քոչարյանը երկար ժամանակ եղել է ազատության մեջ, երբևէ փորձե՞լ է խոչընդոտել քննությանը։ Պատասխան է հնչել, որ ոչ։