Հովիկ Աբրահամյանի եղբայրը կալանավորվեց

Ապօրինի կերպով զենք ձեռք բերելու մեջ մեղադրվող Հենրիկ Աբրահամյանը կալանավորվել է երկու ամսով: Այս մասին տեղեկացրել են ՀՔԾ լրատվական ծառայությունից: Դատարանը որոշում է կայացրել բավարարել հատուկ քննչական ծառայության քննիչի կողմից ներկայացված միջնորդությունը:

Հիշեցնենք, որ ՀՀ հատուկ քննչական ծառայությունում քննվող քրեական գործի շրջանակներում օգոստոսի 10-ին Հենրիկ Աբրահամյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով նախատեսված հանրորեն վտանգավոր այն արարքի կատարման համար, որ նա ապօրինի կերպով ձեռք է բերել և Ամբիկ Գևորգյանի հետ նախնական համաձայնությամբ, վերջինիս անվամբ ձևակերպված, սակայն փաստացի Հենրիկ Աբրահամյանի եղբորը՝ Հովիկ Աբրահամյանին պատկանող` Մխչյանի նախկին մեխանիկա-վերանորոգման գործարանի տարածքում ապօրինի կերպով պահել է հրազեն:

ՀՀ հատուկ քննչական ծառայության քննիչի կողմից միջնորդություն էր ներկայացվել դատարան` Հենրիկ Աբրահամյանի նկատմամբ կալանավորումը որպես խափանման միջոց ընտրելու համար: