15  06  2017

Հանրային խորհուրդը դեմ է բուժհաստատությունների մասնավորեցմանը

Հանրային խորհուրդը դեմ է բուժհաստատությունների մասնավորեցմանը

«Պետական գույքի մասնավորեցման 2017-2020 թվականների ծրագրի մասին» ՀՀ կառավարության օրենսդրական նախաձեռնության շրջանակներում նախատեսվում է մասնավորեցնել նաև մի շարք բուժհաստատություններ, ինչը հանրության շրջանում բազմաթիվ հարցեր ու մտահոգություններ է առաջացրել: Հանրային խորհրդի առողջապահության և սոցիալական հարցերի հանձնաժողովում ստեղծվել էր աշխատանքային խումբ ուսումնասիրելու բարձրացված հարցերը: Հունիսի 14-ին Հանրային խորհրդում կազմակերպվել է նիստ, որին հրավիրվել են մասնակցելու շահագրգիռ բոլոր կողմերը: Նիստը ղեկավարել են ՀԽ անդամ, պրոֆեսոր, ՀՀ ԳԱԱ թղթակից անդամ, պրոֆեսոր Հայրապետ Գալստյանը և ՀԽ անդամ, գրոստմայստեր Սմբատ Լպուտյանը: Նիստին մասնակցել են ՀԽ անդամներ, բուժհաստատությունների ղեկավարներ, Երևանի պետական համալսարաի դասախոսներ, ոլորտի մասնագետներ:

Առողջապահության նախարարի տեղակալը ներկայացրել է մասնավորեցման հիմնավորումները՝ նշելով, որ նշված բուժհիմնարկներն աշխատում են խիստ ցածր շահութաբերությամբ, և անհրաժեշտ է դրանք վերազինել և ներդրումներ իրականացնել: Միաժամանակ փոխնախարարը նշել է, որ մասնավորեցման գործընթացը միանգամից տեղի չի ունենալու, լինելու են քննարկումներ, որի արդյունքում հաշվի են առնվելու նաև առաջարկներ ու դիտողություններ: ՀՀ ճառագայթային բժշկության և այրվածքների կենտրոնի տնօրեն Նորայր Դավիդյանը վրդովմունք է հայտնել, որ մասնավորեցման մասին տեղեկացել է մամուլից, իրենց հետ որևէ նախնական քննարկում տեղի չի ունեցել: Դավիդյանը հավելել է, որ իրենց կենտրոնը լավ վիճակում է, հագեցած լավագույն բուժտեխնիկայով: Նա անընդունելի է համարել խնդիրը միայն շահութաբերության տեսանկյունից քննարկելը՝ նշելով, որ պետք է հաշվի առնել տվյալ կենտրոնի աշխատանքի արդյունավետությունը, պրոֆեսիոնալ կադրերի առկայությունը, նյութատեխնիկական բազան և այլն:

Վնասվածքաբանության, օրթոպեդիայի և վերականգնողական կենտրոնի տնօրեն Վաչագան Այվազյանը նույնպես ներկայացրել է իրենց կենտրոնի արդյունավետ գործունեությունը և շեշտել, որ իրենց հետ մասնավորեցման վերաբերյալ նախնական քննարկում չի եղել: Հիմնավորված չհամարելով մասնավորեցումը՝ կենտրոնի ղեկավարը միաժամանակ նշել է, որ եթե դա այլընտրանք չունի, ապա գոնե հնարավորություն տան, որպեսզի իրենք ձեռք բերեն բուժհաստատությունները, որոնց գործունեության համար տարիներ ի վեր ներդրել են ֆինանսական ռեսուրսներ ու ջանքեր: Հայրապետ Գալստյանը, անդրադառնալով Ուռուցքաբանության ազգային կենտրոնի մասնավորեցմանը, նշել է, որ ուռուցքաբանության կենտրոնում ստացիոնար բուժում ստացած 11 000 հիվանդներից 6200-ը բուժում են ստանում պետական պատվերի շրջանակներում՝ որպես սոցիալապես անապահով և հատուկ խմբերում ընդգրկված անձիք: Նա մտահոգություն է հայտնել, որ մասնավորեցման հետևանքով պետպատվերից օգտվող քաղաքացիների թիվը զգալի կերպով կարող է նվազել: ՀԽ անդամ Էդուարդ Ղազարյանն անդրադարձել է Իզոտոպների արտադրության կենտրոնի մասնավորեցմանը՝ նշելով, որ նման հաստատությունը պետք է լինի միայն պետական և հայտարարվի՝ իբրև հատուկ պաշտպանական օբյեկտ: Ղազարյանը կարևորել է այն փաստը, որ մասնավորեցման հիմքում պետք է դրվի լուրջ պատճառ, որպեսզի հասարակության կողմից ընդունելի լինի, հակառակ դեպքում այն կդիտվի իբրև բյուջեն լցնելու միջոց: ՀԽ անդամ Անահիտ Աղոյանը, կարևորելով խնդիրը, առաջարկել է բուժհաստատությունների ներկայացուցիչների հետ հանգամանորեն քննարկել ու նրանց տեսակետն ու դիրքորոշումը հաշվի առնելուց հետո միայն որոշումներ կայացնել: Աղոյանի խոսքով՝ բարեփոխումների կենտրոնում պետք է լինի մարդը, ոչ թե շահույթը:

Ամփոփելով քննարկումը՝ Գալստյանն ու Լպուտյանը շնորհակալություն են հայտնել ներկաներին շահագրգիռ քննարկման համար՝ առաջարկելով ուսումնասիրել բարձրացված հարցերն ու առաջարկները և կազմակերպել ևս մեկ հանդիպում, որպեսզի առաջարկվող լուծումները բոլոր կողմերի համար լինեն ընդունելի: Փոխնախարարն իր հերթին նշել է, որ այս թեմայի շուրջ քննարկումները շարունակական են լինելու:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ