20 01 2020

Տիգրան Խաչատրյանը մասնակցել է գյուղնախարարների համաշխարհային համաժողովին

Տիգրան Խաչատրյանը մասնակցել է գյուղնախարարների համաշխարհային համաժողովին

ՀՀ էկոնոմիկայի նախարար Տիգրան Խաչատրյանը, Գերմանիայի Դաշնային Հանրապետության գյուղատնտեսության դաշնային նախարար Յուլիա Քլյոքների հրավերով, հունվարի 16-18-ը Բեռլինում մասնակցել է պարենի եւ գյուղատնտեսության գլոբալ ֆորումին, համաժողովի շրջանակներում կազմակերպված գյուղատնտեսության նախարարների 12-րդ համաժողովին, ինչպես նաեւ «Բեռլինյան կանաչ շաբաթ» գյուղատնտեսական միջազգային ամենամյա ցուցահանդեսի պաշտոնական բացման արարողությանը:

«Սնունդ բոլորի համար. առեւտուր` ապահով, բազմազան եւ կայուն սնուցման համար» խորագրով պարենի եւ գյուղատնտեսության գլոբալ ֆորումին մասնակցել են 71 երկրների գյուղատնտեսության նախարարներ եւ 12 միջազգային կազմակերպությունների բարձրաստիճան պաշտոնյաներ: Համաժողովը նախագահել է Գերմանիայի գյուղատնտեսության դաշնային նախարար Յուլիա Քլյոքները:

Գլոբալ ֆորումի շրջանակներում անցկացվել են բազմաթիվ միջոցառումներ, որոնք հնարավորություն են ընձեռել մասնակիցներին անդրադառնալ գլոբալ գյուղատնտեսական քաղաքականությանը եւ պարենային ապահովությանն առնչվող հարցերին ու մարտահրավերներին եւ համաձայնության գալ դրանց շուրջ:

«Առեւտուրը` Կայուն զարգացման նպատակ 2-ին հասնելու գրավական» խորագրով բարձրաստիճան պաշտոնյաների մակարդակով քննարկումն անցկացվել է Առեւտրի համաշխարհային կազմակերպության եւ ՄԱԿ-ի պարենի եւ գյուղատնտեսության կազմակերպության (ՊԳԿ) համանախագահությամբ: Քննարկման ընթացքում մտքեր են փոխանակվել պարենային անվտանգության, կլիմայի փոփոխության եւ թվային տեխնոլոգիաների բնագավառներում առեւտրի դերի եւ փոխազդեցության վերաբերյալ:

Գյուղատնտեսության նախարարների համաշխարհային ամենամեծ հանդիպում հանդիսացող գյուղատնտեսության նախարարների 12-րդ համաժողովի քննարկումներն ընթացել են չորս հիմնական ուղղությամբ։ Տիգրան Խարատրյանը մասնակցել է եւ գործընկերների հետ մտքեր փոխանակել պարենային արժեշղթաների ներառականություն, կայունություն եւ անվտանգություն թեմայով քննարկմանը։

Համաժողովի արդյունքում ընդունվել է համատեղ կոմյունիկե` նպատակ ունենալով խթանել գյուղատնտեսական եւ պարենային ապրանքների առեւտրի դերը կայուն գյուղատնտեսությունն ու պարենային համակարգերն ապահովելու գործում, երաշխավորել համաշխարհային պարենային անվտանգությունը, թերսնման կանխումը եւ ներառական զարգացումը: Կոմյունիկեով սահմանվել է, որ առեւտրի քաղաքականությունը` որպես ինտեգրված եւ համապարփակ ռազմավարության մաս, պետք է ծառայի գյուղատնտեսության եւ պարենային համակարգերի կայունության բարելավմանը:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ