Ինչո՞ւ ես տեղյակ չեմ, ո՞ւմ եք զեկուցել. Վարչապետը դժգոհեց

«Ես տեղեկացա, որ սննդի անվտանգության պետական ծառայության ղեկավար Իշխան Կարապետյանը մայիսի 10-ին եւ մայիսի 16-ին նամակներ է ստացել ՌԴ «Ռոսսելխոզնադզոր» կազմակերպությունից եւ ինձ համար անակնկալ էր, որ ես տեղյակ չեմ այդ նամակների մասին»,- կառավարության՝ մայիսի 24-ի նիստի մեկնարկին ասաց վարչապետ Նիկոլ Փաշինյանը և դիմելով Իշխան Կարապետյանին՝ ասաց. «Պարոն Կարապետյան, ես ուզում եմ իմանալ ձեր գործողությունները այս նամակները ստանալուց հետո: Ես վարչապետի պաշտոնն ստանձնելուց հետո զանգել եմ ձեզ եւ հարցրել, թե արդյոք խնդիրներ ունենք գյուղմթերքի արտահանման ոլորտում, դուք ասել եք, որ խնդիր չկա: Դրանից հետո դուք ստացել եք երկու նամակ: Իմանալով, որ ես այդ հարցով հետաքրքրված եմ, դուք ո՞ւմ եք զեկուցել եւ ի՞նչ գործողություն եք ձեռնարկել խնդիրը լուծելու համար: Գյուղնախարարին, փոխվարչապետերին, վարչապետին զեկուցե՞լ եք»:

Խոսքը վերաբերում էր ռուսական կողմից հայկական լոլիկի ներմուծման արգելքներին:

Իշխան Կարապետյանը նշեց, որ նման նամակները կրում են պարբերական բնույթ, իսկ այս հարցով քննարկումներ են արել ռուս գործընկերների հետ: Հսկողությունն ուժեղացրել են՝ փորձելով հասկանալ, թե ինչ խնդիր է ի հայտ եկել:

Տվյալ բեռում հայտնաբերվել է անհամապատասխանություն, բեռը հետ է ուղարկվել: Համապատասխան խմբաքանակը առանձնացնել է եւ հետ է վերադարձվել արտահանողին, իսկ մնացածը կրկին վերաարտահանվել է:

«Ակնկալում եմ, որ վերջին անգամ ենք այս հարցը քննարկում: Արտահանումը պետք է իրականացվի գյուղմթերքների պահանջներին խիստ համապատասխան: Գյուղմթերքի արտահանման ծավալները մեծանալու են եւ ես խնդրում եմ, որ ձեր ծառայությունը, գյուղնախարարությունը, ՊԵԿ-ը, բոլոր ջանքերը գործադրել, որ գյուղմթերքի արտահանումը տեղի ունենա բնականոն ռեժիմով»,- ասաց վարչապետ Փաշինյանը: